Prishtinë, 12 shkurt 2020 – Përfaqësues të Shoqatës së Kontabilistëve të Çertifikuar dhe Auditorëve të Kosovës po marrin pjesë në konferencën ndërkombëtare të organizuar nga Zyra Kombëtare e Auditimit - "Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit"
Në gusht të vitit të kaluar, Bordi drejtues i INTOSAI-it ka miratuar me shumicë votash anëtarësimin me të drejta të plota të Zyrës Kombëtare të Auditimit të Republikës së Kosovës në këtë organizatë.
INTOSAI është një organizatë e pavarur, profesionale dhe jopolitike e themeluar si një institucion i përhershëm, e cila vepron si një organizatë ombrellë për komunitetin e auditimit të sektorit publik dhe ka status të posaçëm konsultativ me Këshillin Ekonomik dhe Social (ECOSOC) të Organizatës së Kombeve të Bashkuara (OKB).
Ky rezultat është kurorëzim i punës së jashtëzakonshme të Zyrës Kombëtare të Auditimit, institucioneve të Kosovës dhe përkrahjes së partnerëve të saj.
ShKÇAK ka qenë dhe do të mbetet partner i ZKA-së në ngritjen e kapaciteteve profesionale brenda këtij institucioni dhe përkrahëse e punës së Zyrës Kombëtare të Auditimit e cila promovon drejtpërdrejt llogaridhënien dhe ofron një bazë të qëndrueshme të sektorit publik financiar.